Ямак ымбак – мынь тембак

(кырык марла лачок ылмаш)

«Ылымашет – масакет,
Масак сага – лаксакет».
«Анпичы вуй доно масак
шырыдымы арава доно кыдалеш»

(халык шаявла)

Кырык сирышты, ик цевер солашты, Тапнак Микита ылен ылын. Когонок тыды алталаш яратен, маныт доко. Сакой масакымат Микитана ыштылын. Тевеш, икана, пешырыш ик тапнак пырцым оптен шындышат, вакш докы янгышташ чымыктыш. Кыце халык лошты маныт: «Ялжы веле кагакын кайын коды». Микитана вакш докы миэн шагалмыкыжы, когон кужы янгыштышывлан церотым ужын колта.

Тынамшы вереман, вакш докы янгышташ толшывлалан костан порадка ылын. Кыды–тиды эдемвлажы ик мешак пырцым веле янгышташ канденыт, а кыдывлажы – шукыракым. Техень янгыштышывлажы циланок церотышты шалгышашлык ылыныт. Кынамжы лиалтын, кыдывлажы изиш веле, икта-маняр ыр пырцым кормештал пиштен кандат да – тынам ныным церот гыц гач моло колтеныт.

Ти гана, Микита вуйжымат ыдырал колтыш, да мам ышташат ак палы, но шукым тумаяш ыш тынгал. Церотышты шалгышы халык докы кыргыж мишат: «Мыньын ик тапнак пырцы веле, шукат агыл, церотдеок пыртен колтыдай», - маньы. Тенге йой ырвыжла, халыкым алтален-алталенок, Микитана церотышты шалгыдеок пырцымат вакш гыц янгыштен лакты. Ик гана тенге циганланен нангеш да вес цуцамат пашкудывлам алтален кодыш – тенге халык лошты ядмашат лактын кеш. «Маняр пырцы вара тапнакышкыжы пыра?» - манмы шаяат шакташ тынгальы. Вара веле, висымы паштек, цила сола халык пален налевы, вуйта Микитан ик пешыр тапнакышкыжы, лачокат-цуратат, ик мешак гыц чыды агыл пырцы пырен кеа. Тенге Микитам, мындырланен каштмыжы гишан, халык лошты Тапнак - Микита манаш тынгалыныт. Тишакен: «Ямак ымбак – мынь тембак».

(Перевод)

Сказка – туда, а я – сюда

(быль с горномарийского языка)

«Жизнь-диво,
А рядом с дивом – яма»
«За околицей
на немазаной телеге чудо скачет»
(народные поговорки)

В горномарийском крае, в одной прелестной деревеньке, жил да был Микита-Пастерка. Говорят, что уж очень он приврать любил. По- разному чудил он в жизни селян. Однажды случилось так, что, уложив полную Пастерку зерна, он побежал молоть зерно на мельницу. Как в народе говорится: «Галопом поскакал». Прибежав на мельницу, увидел длиннющую очередь.

В те далёкие времена, по правилам, было принято стоять в очереди всем, кто на помол принёс один мешок муки и более, а у кого зерна мало, как говорится, всего лишь горсточка, то их бывало, и без очереди могли пропустить.

У Микиты даже голова зачесалась. Стоять в очереди ему ой как не хотелось. «Что же делать?», - подумал Микита. Недолго думая, решил пролезть всё же без очереди. И говорит он соседям: «У меня всего лишь одна пастерка зерна, пропустите меня вне очереди». Действуя словно хитрый лис, он всё-таки наперекор всем пробрался молоть зерно на мельницу с полной пастеркой. Получилось так, что однажды схитрил перед соседями, потом и второй раз увильнул от очереди. Но всему приходит конец – среди народа пошли слухи. Люди стали интересоваться: «Какой объём зерна всё же в его пастерку-то вмещается?» Только спустя какое-то время, всё население узнало правду. Оказалось, что в пастерку Микиты, на самом деле, вмещается ничуть не меньше одного мешка зерна. Таким манером, за лживость и изворотливость в характере, Микиту в народе прозвали Микитой - Пастеркой. На этом: «Сказка – туда, а я – сюда».

МУ «Козьмодемьянский музейный комплекс»
старший научный сотрудник отдела
по национальной культуре Акцорина А.Я.